Articles

ਕਦੋਂ ਮੁਕਤ ਹੋਣਗੀਆਂ ਕੋਝੀਆਂ ਪਰੰਪਰਾਵਾਂ ਤੋਂ ਔਰਤਾਂ? 

Harkirat Kaur Sabhara
ਲੇਖਕ: ਹਰਕੀਰਤ ਕੌਰ ਸਭਰਾ, ਤਰਨਤਾਰਨ

ਨਾਰੀ ਸੁਸ਼ਕਤੀਕਰਨ ਦੇ ਨਾਮ ਉੱਪਰ ਪਿਛਲੇ ਕੁਝ ਸਮੇਂ ਤੋਂ ਪਤਾ ਨਹੀਂ ਕਿੰਨੇ ਕੁ ਪ੍ਰੋਗਰਾਮ, ਸਮਾਗਮ, ਸਰਗਰਮੀਆਂ ਦਾ ਆਯੋਜਨ ਕੀਤਾ ਜਾ ਰਿਹਾ ਹੈ। ਦੇਸ਼ ਦੀਆਂ ਸਰਕਾਰਾਂ ਨੇ ਯਤਨ ਕੀਤਾ ਕਿ ਔਰਤਾਂ ਦੇ ਜੀਵਨ ਪੱਧਰ ਨੂੰ ਉੱਚਾ ਚੁੱਕਣ ਲਈ ਅਜਿਹੇ ਕਦਮ ਚੁੱਕੇ ਜਾਣ ਜਿੰਨਾ ਨਾਲ ਔਰਤਾਂ ਆਤਮ ਨਿਰਭਰ ਹੋ ਸਕਣ, ਆਰਥਿਕ ਪੱਖੋਂ ਮਜ਼ਬੂਤ ਹੋ ਸਕਣ। ਵੱਖ-ਵੱਖ ਤਰੀਕਿਆਂ ਨਾਲ ਔਰਤਾਂ ਨੂੰ ਤਕਨੀਕੀ ਤੇ ਮਿਆਰੀ ਸਿੱਖਿਆ ਦੇਣ ਦੇ ਵੀ ਯੋਗ ਪ੍ਰਬੰਧ ਕੀਤੇ ਗਏ। ਔਰਤਾਂ ਨੂੰ ਬਰਾਬਰਤਾ ਦੇ ਮੌਕੇ ਪ੍ਰਦਾਨ ਕਰਨ ਲਈ ਵੀ ਬਹੁਤ ਸਾਰੇ ਯਤਨ ਕੀਤੇ ਗਏ, ਜਿੰਨਾ ਦਾ ਬਹੁਤ ਸਾਰੀਆਂ ਔਰਤਾਂ ਨੇ ਲਾਭ ਵੀ ਉਠਾਇਆ। ਤਿੰਨ ਤਲਾਕ ਤੇ ਵੀ ਦੇਸ਼ ਦੀ ਨਿਆਪਾਲਿਕਾ ਨੇ ਇਸ ਅਣਮਨੁੱਖੀ ਪ੍ਰਥਾ ਨੂੰ ਖਤਮ ਕਰਨ ਦੇ ਨਾਲ ਨਾਲ ਅਜਿਹਾ ਅਪਰਾਧ ਕਰਨ ਵਾਲਿਆਂ ਵਿਰੁੱਧ ਸਜ਼ਾ ਦੀ ਵਿਵਸਥਾ ਵੀ ਕੀਤੀ। ਇਸ ਤੋਂ ਇਲਾਵਾ ਅਸੀ ਦੇਖਦੇ ਹਾਂ ਕਿ ਅੱਜ ਔਰਤ ਨੇ ਹਰ ਖੇਤਰ ਵਿੱਚ ਮੱਲਾਂ ਮਾਰੀਆਂ ਹਨ । ਸਿੱਖਿਆ, ਸਿਹਤ,ਸੁਰੱਖਿਆ, ਖੇਡ, ਵਿਗਿਆਨ ਕੋਈ ਵੀ ਖੇਤਰ ਹੋਵੇ ਕੁਝ ਔਰਤਾਂ ਨੇ ਆਪਣੀ ਹੋਂਦ ਨੂੰ ਦੁਨੀਆਂ ਸਾਹਮਣੇ ਪੇਸ਼ ਕੀਤਾ ਹੈ। ਪਰ ਇਹ ਕਹਾਣੀ ਕੁਝ ਕੁ ਔਰਤਾਂ ਦੀ ਹੈ, ਜੋ ਮੀਡੀਆ ਦੀ ਤੇਜ਼ ਅੱਖ ਦੇ ਅੱਗੇ ਆ ਗਈਆਂ।

ਇੱਕ ਕਹਾਣੀ ਕੈਮਰੇ ਤੋਂ ਪਿੱਛੇ ਦੀ ਵੀ ਹੈ, ਉਹ ਕਹਾਣੀ ਉਹਨਾਂ ਔਰਤਾਂ ਦੀ ਹੈ ਜਿੰਨਾ ਤੱਕ ਨਾ ਤਾਂ ਸਰਕਾਰਾਂ ਵੱਲੋਂ ਮੁਹੱਈਆ ਕਰਵਾਈਆਂ ਜਾਂਦੀਆਂ ਸਹੂਲਤਾਂ ਜਾਂ ਮੌਕੇ ਪਹੁੰਚੇ, ਨਾ ਮੀਡੀਆ ਦੇ ਕੈਮਰੇ ਦੀਆਂ ਅੱਖਾਂ। ਬਹੁਤਾਤ ਔਰਤਾਂ ਜਿੰਨਾ ਵਿਚੋਂ ਜਿਆਦਾਤਰ ਨਵਵਿਆਹੁਤਾ ਜਵਾਨ ਲੜਕੀਆਂ ਹਨ, ਦੀ ਹਾਲਤ ਬਹੁਤ ਤਰਸਯੋਗ ਹੈ। ਆਪਣੇ ਹੀ ਘਰਾਂ ਵਿੱਚ ਹਿੰਸਾ ਦੀਆਂ ਸ਼ਿਕਾਰ ਹੁੰਦੀਆਂ ਔਰਤਾਂ ਬੇਬਸ ਹਨ, ਪਹਿਲਾਂ ਪੇਕੇ ਘਰ ਵਿਤਕਰੇ ਦਾ ਸਾਹਮਣਾ ਕਰਨ, ਪੜਨ ਦੇ ਸਹੀ ਮੌਕੇ ਨਾ ਮਿਲਣ ਕਰਕੇ ਆਪਣੇ ਸੁਪਨਿਆਂ ਨੂੰ ਅੰਦਰੋਂ ਅੰਦਰੀ ਘੁੱਟ ਕੇ ਵਿਆਹੁਤਾ ਜੀਵਨ ਦੀ ਸ਼ੁਰੂਆਤ ਕਰਦੀਆਂ ਹਨ ਫਿਰ ਉੱਥੇ ਵੀ ਜਾ ਕੇ ਤਸ਼ੱਦਦ ਸਹਿਣਾ ਪੈਂਦਾ ਹੈ, ਸਾਡੇ ਸਮਾਜ ਦੀ ਤਰਾਸਦੀ ਵੇਖੋ ਕਿ ਇੱਕ ਮਰਦ ਔਰਤ ਉੱਪਰ ਚਾਹੇ ਕਿਸੇ ਵੀ ਤਰ੍ਹਾਂ ਜ਼ੁਲਮ ਕਰੇ, ਕਿੰਨਾ ਵੀ ਤਸ਼ੱਦਦ ਕਰੇ, ਬੜੇ ਹੱਕ ਨਾਲ ਔਰਤ ਨੂੰ ਇਸ ਗੱਲ ਦਾ ਅਹਿਸਾਸ ਕਰਵਾਉਣ ਦਾ ਯਤਨ ਕੀਤਾ ਜਾਂਦਾ ਹੈ ਕਿ ਜਿਵੇ ਉਸਨੇ ਔਰਤ ਬਣ ਕੇ ਕੋਈ ਪਾਪ ਕੀਤਾ ਹੋਵੇ। ਘਰ ਦੇ ਸਾਰੇ ਕਾਰ ਵਿਹਾਰ ਸੰਭਾਲਦਿਆਂ ਵੀ ਔਰਤ ਨੂੰ ਸੱਸ, ਸਹੁਰੇ, ਪਤੀ ਦੀਆਂ ਵਧੀਕੀਆਂ ਦਾ ਸ਼ਿਕਾਰ ਹੋਣਾ ਪੈਂਦਾ ਹੈ। ਜਿਹੜੀ ਔਰਤ ਇਹਨਾਂ ਵਧੀਕੀਆਂ ਦਾ ਚੁੱਪ ਚਾਪ ਸਾਹਮਣਾ ਕਰਦੀ ਰਹੇ, ਦੁੱਖ ਦਰਦ, ਵਿਤਕਰੇ ਆਪਣੇ ਆਪ ਉੱਪਰ ਹੰਢਾਉਂਦੀ ਰਹੇ ਫਿਰ ਤਾਂ ਔਰਤ ਬਹੁਤ ਮਹਾਨ ਹੈ, ਸਾਊ ਹੈ, ਉੱਚੇ ਆਚਰਣ ਵਾਲੀ ਹੈ, ਪਰ ਜੇ ਕਿਤੇ ਉਸਨੇ ਹਿੰਮਤ ਕਰਕੇ ਜੁਲਮ ਦੇ ਵਿਰੁੱਧ ਅਵਾਜ਼ ਉਠਾਉਣ ਦਾ ਯਤਨ ਕੀਤਾ, ਆਪਣੀ ਜਿੰਦਗੀ ਨੂੰ ਲੀਹੇ ਪਾਉਣ ਲਈ ਕਦਮ ਚੁੱਕਿਆ ਤਾਂ ਸਾਡੇ ਸਮਾਜ ਵੱਲੋਂ ਉਸੇ ਔਰਤ ਨੂੰ ਸਵਾਲੀਆਂ ਨਜ਼ਰਾਂ ਨਾਲ ਵੇਖਿਆ ਜਾਂਦਾ ਹੈ। ਪਤਾ ਨਹੀਂ ਸਾਡੇ ਸਮਾਜ ਵਿੱਚ ਕਿੰਨੀਆਂ ਹੀ ਅਜਿਹੀਆਂ ਔਰਤਾਂ ਹਨ ਜੋ ਸਮਾਜ ਦੇ ਸਵਾਲਾਂ ਤੋਂ ਡਰਦੀਆਂ ਜ਼ੁਲਮ ਸਹਿੰਦੀਆਂ ਰਹਿੰਦੀਆਂ ਹਨ ਅਤੇ ਨਰਕ ਭਰੀ ਜਿੰਦਗੀ ਜੀਅ ਰਹੀਆਂ ਹਨ।ਬਹੁਤ ਸਾਰੀਆਂ ਔਰਤ ਪਾਠਕਾਂ ਆਪਣੀਆਂ ਮੁਸ਼ਕਿਲਾਂ ਜਦ ਸਾਂਝੀਆਂ ਕਰਦੀਆਂ ਹਨ ਤਾਂ ਮਨ ਸੋਚਣ ਲਈ ਮਜ਼ਬੂਰ ਹੋ ਜਾਂਦਾ ਹੈ ਕਿ ਕਿਸੇ ਇੱਕ ਇਨਸਾਨ ਦੀ ਜਿੰਦਗੀ ਨੂੰ ਕੰਟਰੋਲ ਕਰਨ ਦਾ ਅਧਿਕਾਰ ਕਿਸੇ ਦੂਸਰੇ ਇਨਸਾਨ ਨੂੰ ਕਿਵੇਂ ਹੋ ਸਕਦਾ ਹੈ। ਜੀਵਨ ਰੂਪੀ ਤੋਹਫ਼ਾ ਕੁਦਰਤ ਵੱਲੋਂ ਮਿਲਿਆ ਹੈ, ਕਿਸੇ ਦੂਸਰੇ ਵਿਅਕਤੀ ਨੂੰ ਕਿਸੇ ਇੱਕ ਦੀ ਜਿੰਦਗੀ ਖਰਾਬ ਕਰਨ ਦਾ ਕੋਈ ਅਧਿਕਾਰ ਨਹੀਂ ਹੈ। ਹਰ ਇੱਕ ਨੂੰ ਆਪਣੀ ਜਿੰਦਗੀ ਜਿਊਣ ਦਾ ਹੱਕ ਹੈ। ਸੱਸਾਂ, ਨਨਾਣਾਂ, ਨੂੰਹਾਂ ਦੇ ਰੂਪ ਵਿੱਚ ਬੈਠੀਆਂ ਔਰਤਾਂ ਨੂੰ ਚਾਹੀਦਾ ਹੈ ਕਿ ਘੱਟੋ ਘੱਟ ਤੁਸੀਂ ਇੱਕ ਦੂਸਰੇ ਦੀ ਤਾਕਤ ਬਣੋ। ਇੱਕ ਔਰਤ ਦੂਸਰੀ ਔਰਤ ਦਾ ਸਾਥ ਦੇਵੇ ਤਾਂ ਸਮਾਜ ਵਿੱਚ ਔਰਤਾਂ ਦੀ ਸਥਿਤੀ ਕੁਝ ਹੱਦ ਤੱਕ ਸਹੀ ਕੀਤੀ ਜਾ ਸਕਦੀ ਹੈ। ਬਹੁਤ ਸਾਰੀਆਂ ਔਰਤਾਂ ਅਜਿਹੀਆਂ ਹਨ ਜੋ ਸਿੱਖਿਅਤ ਹੋਕੇ ਵੀ ਆਪਣੇ ਫ਼ੈਸਲੇ ਖੁਦ ਨਹੀਂ ਕਰ ਸਕਦੀਆਂ। ਦੇਸ਼ ਦੀਆਂ ਸਿੱਖਿਅਤ ਔਰਤਾਂ ਵੀ ਖਾਮੋਸ਼ ਕਿਉਂ ਰਹਿੰਦੀਆਂ ਹਨ? ਜੇਕਰ ਔਰਤਾਂ ਆਪਣੇ ਫ਼ੈਸਲੇ ਆਪ ਨਹੀਂ ਕਰਨਗੀਆਂ, ਜੁਲਮ ਵਿਰੁੱਧ ਅਵਾਜ਼ ਨਹੀਂ ਉਠਾਉਣ ਗੀਆਂ ਤਾਂ ਉਹਨਾਂ ਕੋਲ ਕੋਈ ਹੱਕ ਨਹੀਂ ਕਿ ਉਹ ਆਪਣੇ ਹਲਾਤਾਂ ਨੂੰ ਕੋਸਣ । ਜੇਕਰ ਅਸੀਂ ਸਮਰੱਥ ਹੋਣ ਦੇ ਬਾਵਜੂਦ ਵੀ ਗਲਤ ਵਿਰੁੱਧ ਅਵਾਜ਼ ਬੁਲੰਦ ਨਹੀਂ ਕਰਦੀਆਂ ਤਾਂ ਸਮਾਜ ਵਿੱਚ ਔਰਤ ਦੀ ਹਾਲਤ ਕਦੇ ਵੀ ਨਹੀਂ ਸੁਧਰ ਸਕੇਗੀ।
ਇਹ ਬਹੁਤ ਸਾਰੀਆਂ ਔਰਤਾਂ ਦੀ ਕਹਾਣੀ ਹੈ ਜੋ ਘਰੇਲੂ ਹਿੰਸਾ ਦਾ, ਦੁਰਵਿਵਹਾਰ ਦਾ ਸ਼ਿਕਾਰ ਹੁੰਦੀਆਂ ਹਨ। ਜਿੰਨਾ ਤੱਕ ਕੋਈ ਸਹੂਲਤ ਨਹੀਂ ਪੁੰਹਚਦੀ, ਪਰ ਇੱਕ ਗੱਲ ਸਾਰੀਆਂ ਔਰਤਾਂ ਨੂੰ ਸਮਝਣੀ ਪਵੇਗੀ ਕਿ ਜਿਹੜਾ ਖੁਦ ਬੰਦਿਸ਼ਾ ਤੋਂ ਮੁਕਤ ਨਹੀਂ ਹੋਣਾ ਚਾਹੁੰਦਾ ਉਸਨੂੰ ਰੱਬ ਵੀ ਮੁਕਤ ਨਹੀਂ ਕਰ ਸਕਦਾ।
ਜੇਕਰ ਔਰਤ ਚਾਹੁੰਦੀ ਹੈ ਕਿ ਉਹ ਵੀ ਖੁੱਲੇ ਅਸਮਾਨ ਵਿੱਚ ਅਜਾਦ ਪੰਛੀ ਵਾਂਗ ਉਡਾਰੀ ਭਰ ਸਕੇ, ਉਹ ਸੌੜੀ ਸੋਚ ਦੇ ਬੰਧਨਾਂ ਤੋਂ ਮੁਕਤ ਹੋਵੇ ਤਾਂ ਔਰਤ ਨੂੰ ਖੁਦ ਹੰਭਲਾ ਮਾਰਨਾ ਪਵੇਗਾ। ਆਪਣੇ ਲਈ ਅਵਾਜ਼ ਉਠਾਉਣੀ ਪਵੇਗੀ। ਨਾਲ ਦੀ ਨਾਲ ਇਹ ਵੀ ਧਿਆਨ ਵਿੱਚ ਰੱਖਣਾ ਪਵੇਗਾ ਅਜ਼ਾਦੀ ਦਾ ਅਰਥ ਖਰੂਦ ਪਾਉਣਾ ਕਦੇ ਨਹੀਂ ਹੁੰਦਾ, ਅਜ਼ਾਦੀ ਤੋਂ ਭਾਵ ਹੱਕਾਂ ਦੀ ਅਜ਼ਾਦੀ, ਨਿਰਭਉ ਹੋਕੇ ਉਡਾਣ ਭਰਨ ਦੀ ਖੁਲ੍ਹ ਹੈ।
ਸਮਾਜ ਵਿੱਚ ਬਣੀਆਂ ਇਹ ਕੋਝੀਆਂ ਪੰਰਪਰਾਵਾਂ ਜੋ ਔਰਤਾਂ ਦਾ ਗਲਾ ਘੁੱਟਦੀਆਂ ਹਨ, ਸਭ ਔਰਤਾਂ ਦੇ ਸਾਝੇਂ ਸਹਿਯੋਗ ਨਾਲ ਹੀ ਦੂਰ ਹੋ ਸਕਦੀਆਂ ਹਨ। ਬਚਪਨ ਤੋਂ ਆਪਣੇ ਬੇਟਿਆਂ ਨੂੰ ਔਰਤਾਂ ਦੀ ਇੱਜ਼ਤ ਕਰਨੀ ਸਿਖਾਉ। ਘਰ ਵਿੱਚ ਨੂੰਹ ਪੁੱਤ ਦੀ ਕਹਾਸੁਣੀ ਵਿੱਚ ਨੂੰਹ ਦੇ ਨਾਲ ਸਾਹਸ ਨਾਲ ਖੜੋ ਤੇ ਉਸਦਾ ਸਾਥ ਦਿਓ ਤਾਂ ਜੋ ਇੱਕ ਔਰਤ ਦੂਸਰੀ ਔਰਤ ਦੇ ਮੋਢੇ ਨਾਲ ਮੋਢਾ ਜੋੜ ਸਮਾਜ ਵਿੱਚ ਔਰਤਾਂ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾ ਸਕੇ। ਸਰਕਾਰਾਂ ਦਾ ਯਤਨ ਹੋਣਾ ਚਾਹੀਦਾ ਹੈ ਕਿ ਔਰਤ ਦੀ ਸੁਰੱਖਿਆ ਲਈ ਮੁਹੱਈਆ ਕਰਵਾਈਆਂ ਜਾਣ ਵਾਲੀਆਂ ਸਹੂਲਤਾਂ ਦੇਸ਼ ਦੀ ਹਰ ਔਰਤ ਤੱਕ ਪੁੱਜਦੀ ਹੋਵੇ। ਹਰ ਔਰਤ ਐਨੀ ਕਾਬਿਲ ਹੋਵੇ ਕਿ ਆਪਣੇ ਜੀਵਨ ਨਿਰਬਾਹ ਲਈ ਕਿਸੇ ਉੱਪਰ ਨਿਰਭਰ ਨਾ ਹੋਣਾ ਪਵੇ।

Related posts

ਠੋਸ ਕੂੜੇ ਕਰਕਟ, ਪਰਾਲੀ ਅਤੇ ਗੋਬਰ ਗੈਸ ਤੋਂ ਬਿਜਲੀ ਬਣਾਉਣੀ, ਕੋਲੇ ਦਾ ਉੱਤਮ ਬਦਲ ਹੋ ਸਕਦਾ !

admin

ਪਾਕਿ ਨੂੰ ਮਾਤ ਦੇਣ ਵਾਲੀ ਤੇ ਵਰਲਡ ਰਿਕਾਰਡ ਹੋਲਡਰ ‘ਸਰਸਵਤੀ’

admin

ਪਾਈਨਐਪਲ  ਖਾਓ – ਬੀਮਾਰੀ ਭਜਾਓ

admin